几日之前网上流传一条声，指名道姓话“袁咏仪怒骂占中人渣”，声带中女声自称五十岁，话自己本身系政治冷感嘅人，奈何近日被占中激到飞起，仲话自己好激动咁同个仔讲:“嗰啲年轻人，嗰啲行为，令我好激愤，但系我唔会话反对阿仔你占中，但奈何，你家迫到我不得不要反占中。”
何解?呢把女声话，最重要系因为老师向学生“灌输”讯息，佢话:“我哋为未来，将来系我哋嘅，将来唔关你事，下?我要出去占中!”呢把女声听完阿仔咁样复述老师的话，嬲到火起:“咁即系咩意思呀?唔关我事呀?即系话，你死得0架喇!同我讲。原来你哋呢啲所谓侧边嘅，为人师表系咁样教我啲仔女，我点敢俾啲仔女返学呀?”条声长逾8分钟。
其实把声根本就不是靓靓袁咏仪，而她两日前亦有于微博澄清，话:“今日网上流传一位女仕对政治的言论，因为声线与本人相似，让很多朋友及民众误会是本人和忧心，请放心!此刻的我只寄望学生及民众能安全及冷静地回家!”
无奈，传闻依然传之不绝，一个话系，就广传到一百个都话系。结果靓靓今日再次更新微博澄清道:“再次澄清这段声音录音并不是本人，有关转发机构请删除我的照片，勿再误导民众!”
袁咏仪接受本报访问时谓:“最近喺网上有一位女士，发表咗一啲占中嘅言论，因为佢嘅声音同本人有啲相近，再加上有啲传媒喺未求证下就加上咗我嘅相片，而产生好多误解以为系我，同埋令我嘅朋友担心。其实现阶段我只系想事情可以尽早得到沟通，心平气和咁去解决，令到香港可以好似以前一样繁荣。”
