陈茂波话未来5年会用《收回土地条例》收番700公顷新界私人土地，其实系真系想斗地主、大有为定扮勇武?
睇番清楚个条数，原来口中个700公顷，9成9系现有新发展区讲左好多年个堆私人农地，粉岭北+古洞北(182公顷)、元朗南(223公顷)同洪水桥（324公顷），根本只系重覆用条旧数扮做野，而唔系依家个社会讲紧呢堆新发展区外既棕地（例如元朗横洲）同地产商周围囤积既农地，所以700讲公顷根本就唔会有额外既公屋多左出黎。
跟进左新界囤地收地问题假假地都成10年，当然唔会忘记，700公顷重会收埋陈茂波自己个块在90年代买落既上万呎古洞北农地。多谢香港畸型既体制，俾人话「囤地波」咁多年唔单唔驶落台，今日重有得升官发财，同依家林郑一模一样。如果古洞北因新发展区而升级去甲级农地赔偿，讲紧当年买入价约100元/呎今日可赔成1300元/呎，完全不劳而获炒农地赚上十倍。
从以上分析，会收700公顷好明显亦都系玩数字游戏，扮下积极解决房屋问题消弭民愤，因为唔单只翻炒条数，当中既私人农地政府其实有唔少已经同紧地产商进行「原址换地」，即系类似依家讲个种「土地共享」咁公私合营私相授受，唔收地产商囤番黎既地直接俾佢地起原址起豪宅。所以700公顷条数会有好多收地水份，换剩既小地主、小农户既地先会俾政府未来用土收做公屋同设计，当然唔少得收黎起基建俾地产商区内啲私楼地，咁又点会系叫斗地主呢?
剩系睇全新界最大农民恒基地产最新年报，话到明粉岭北以前囤落既240万呎农地有3分1(80万呎)都换到变屋地，总楼面面积去到400多万呎，囤中既位重准过欢乐彩虹抛银仔。四叔买个阵主要系90年代末2000年中末，买既价讲紧系200至300/呎，俾你农地转屋地差唔多double左个呎数不但只，未来系一呎卖成2万至3万/呎既天价豪宅，其实最尾又会系咩人买?
对着依家个特区政府真系hopeless，依家一边走出黎话对话另一边又开始出黎造假数，以为可以用番以前啲玩数字就呃市民做到野继续玩利益输送，所以大家真系唔好简单以为用土收就解决到房屋问题，因为整个体制已经腐烂到一个点，香港去到呢个田地，囤地波重要黎同你玩数字，伪善至极。
陈剑青，本土研究社成员，专研城市空间、房屋土地问题，致力推动在地民间研究及民间教学。FB: https://www.facebook.com/kimching.geographer
