八方一向有拜读嘅《阳光时务周刊》，最近出现连环大地震，震央波及来自《南方》报系嘅前高层。继总编辑程益中喺3月初求去之后，上个星期杂志社同事再收到一个唔系好开心嘅消息，就系主编长平都起身走人。唔少人都觉得事出突然，认为长平离开系好可惜，矛头直指系咪老板陈平过度插手干预运作?据闻有员工谂紧系咪要写封联署反映员工心声。
主编长平也劈炮
长平系《南都周刊》前副总编辑，经常因打擦边球被处分，2011年“被辞职”，旧年加入咗《阳光时务》，深得同事敬重。但系喺上星期出版嘅《阳光时务》，对于佢嘅去留就露出端倪。事关本杂志每期都会有由长平亲自撰写嘅〈主编的话〉，但上一期个版就冇咗〈主编的话〉呢四粒字，只得一篇长平署名文章。到咗上周五，同事就收到长平电邮，话自己唔再系主编。
长平走人，表面原因系佢未能取得工作签证嚟香港，经常要遥控编务。但有知情者就同八方讲，据闻佢同之前劈炮嘅程益中、仲有执行主编张洁平一样，都系顶唔顺老板陈平事事干预嘅作风，所以唔捞。陈平虽然未去到干预新闻自由咁严重，之但系经常喺起题用字、报道方向方面，都同专业嘅编采人员拗餐饱，令人好气馁咁话。
据闻长平走人，会由笔名雨文嘅香港总监唐朝雯顶住先。但同事现时士气低落，只希望陈平唔好咁多声气，畀佢哋正正常常咁发挥，做多啲好新闻。
