小康之家的睡房内，大学生阿芝握着一个装了水的胶樽，反覆练习投掷的姿势。为免惊动家人和弄坏房中物品，她不会将水樽掟出去，只是想身体牢牢记住那个投掷的动作和角度，“因为我好惊掟到队友或记者。”
臂要直，挥动幅度不用太大，樽要反手拿，才掷得远。她搜集抗争现场的影片看了又看，观察用不同姿势掷出燃烧弹的效果，务求在防暴速龙怒奔、群众逃跑、记者走位拍摄的千钧一发间，将手中的“魔法”准确地掷到警员和示威者之间，顺利爆开、起火，而不伤及无辜。
当警方用水炮车、真枪实弹等致命武器已成常态，抗争者亦越来越多用火阻止警方推进、甚至偶作反攻。他们称燃烧弹为“火魔法”。
由夏入秋，香港的街头由200万人，剩下十多万，甚至很多时只有一万几千。大学生阿亨在前线一回头间，身边只剩与自己年纪相若、甚至更小的中学生，手腕比手中铁通还细瘦，坚决而不知所措。拿着火魔法的他看不到有后退的空间，只想问，大人们是否还要继续留在自己的 comfort zone？
“火可以用来进攻，可能救回几百个手足的前途，亦可能系我哋最后一条防线。手上那支火，唔单单系武器，仲系香港人嘅勇气、希望、反抗嘅意志。”一名已被捕而无法受访的魔法师传来这段文字给记者。
纵火的最高刑罚是终身监禁，比暴动罪的十年重得更多。八月初，火魔法师只是零星出现，但随着警暴升级，目测估计会用火魔法的示威者已增至数十人，但同时他们亦面临最严峻的搜捕。《立场》辗转接触到其中三位，了解他们抗争升级的历程。
***
学校没教的一堂化学课
7.21除了元朗白衫人恐袭，还有两项当时未必为意的标志性事件：上环第一次有示威者用杂物燃起火堆作路障；民阵游行后直捣中联办的队伍中，群众齐声高呼“光复香港、时代革命”。这口号之前只有部份年轻人会喊，但那天，终于在充满和理非的游行队伍中成为主流。
阿亨和身边的前线朋友听在耳中，觉得鼓舞，“大家的思维原来已经进步了，愿意讲出‘革命’两个字。咁，如果你有革命嘅条件，实际上都要做到武力升级。”他记得之后7.27光复元朗，前线在乡黑刀手袭击的阴霾下仍士气甚佳，很多小队开始讨论火魔法。8.5七区三罢，湾仔警总外便有人掷出两颗燃烧弹。
制作原理简单，“玻璃樽装了电油加食油，跟住插布条，点火，掉埋去就着。”阿亨说这种基本款不少前线朋友都略有认识，抗争者群组也有介绍。
（图中并非本文受访者）
综合网上资料和讨论，白电油比汽油容易买到，但用汽油烧起来会较大火；加入面粉、砂糖等可提升燃烧时的热度和持续时间，加入白磷则会令击发时火势更猛烈，可令火团扩张到至少半米范围，并会将物件燃烧至尽才熄灭。然而其危险度高易生意外，白磷在香港的买卖受限制，极难取得，用白磷的魔法师并不多。初阶者也大多用比较易买的白电油，故严格来说不是“汽油弹”。其他原料基本上超市有售，“而家已经进化到，都唔洗一班特定的火魔法师，有啲细路自己带住两樽去，拎出嚟就掟。我估佢哋都系上网睇到就跟住整。”阿亨说。
另一位“火魔法师”阿芝说，现在有时买白电油和汽油都会被商户要求登记身份证，故在准备原料的环节已有风险。队友试过买完后被不明人士跟踪，虽然没被捕或搜身，亦非常惊险；也试过准备好物料带出去时离远见到警察，惟及时将袋放在隐蔽地方。阿芝本人则尚未遇过搜查，“佢哋好少俾我带，都系叫我带啲玻璃樽、毛巾、砂糖面粉咁。可能我系队入面唯一一个女仔，佢哋好唔想女仔有事，始终......女仔入到警署之后危险系大啲。”
J是火魔法的新手，十月才第一次用。由于不熟手，会选择先混好“魔法水”带到现场用，“如果到现场先拎个漏斗出来慢慢倒，好似搞唔掂。”但阿芝所见，都有不少人是即场做，“近几次出去发现，好多后排的和理非，书包里都会有一两样物料准备咗。佢哋可能唔敢整或者无机会整，但知道有魔法师在场都会即刻将材料俾晒我哋，对上嗰次系多到有盈余要带返屋企。”
“魔法师”的手势
受访的三名“魔法师”都是大学生，今夏之前莫说汽油弹，连砖都没掉过。阿亨落场用之前只练过一次，“大概知道个手感系点就去。风头火势，都唔想带咁多次出去练然后提升自己被捕风险。”
他观察到通常“火魔法师”的意外都是烧到自己，“手臂伸到好后成个膊头 fing出去嗰啲呢，因为掟砖系哩个手势嘅，但火魔法有个大火头，你将个火头离开咗自己视线范围，个人就好易着火。我都试过一次件衫着咗少少。其实火魔法轻过砖好多，重点系掟得准。”
阿芝则在家模拟练习，“睇咗好多次啲片，发现问题系佢哋只手伸得唔够直，投掷距离就会好窄。同埋反手拎樽会易啲发力，可以掉远啲。”在家不能把樽掷出去，没有示威的日子，她就和队友找片空地掟水樽，“试多几次会知道自己可以掉到几远、力度系点，就无咁易失手。始终火唔系咁易控制嘅嘢，我真系唔想整亲自己人、记者、或者消防同 first aid，所以做咗好多功课。”
J试过和队友带着“魔法水”到荒山野岭试用，途中与几个警察擦身而过，“嗰吓真系惊到痴线。几个后生仔带着白电油和汽油喺身，佢哋一定知道你想做乜，都预咗有咩事即刻跑。”
那次幸运地没被搜查，但他不知道运气几时会用完。“其实而家带好多嘢都要冒险，比如头盔眼罩猪嘴，本身你带出去保护自己，只带一套的话，佢拉你返去坐48个钟就无事，唔会告得入咩罪。但带多套就麻烦喇，我都有做哨兵，有大声公同哨子，哩啲都有机会俾人告煽动。之前有把锤仔、铰剪、士巴拿，佢已经可以话系攻击性武器，条罪都系大嘅。”
***
“终于喺哩场革命之中，有我存在嘅价值”
冒着极大的风险和刑责去用火，本应是个困难的决定，但随着六月开始的事情发展下来，他们三人都彷佛顺理成章就走到这个位置。
阿亨和阿芝五年前参与伞运时都是中学生，见证过和理非模式的失败，今年6.9反送中游行都没意欲出来。第一次出是6.12，“见到中信对出民阵嗰个和平集会都被清场，好多人无 gear都被迫食催泪弹，几乎人踩人，”阿芝说，“我就知道今次件事唔似2014年咁简单，决定之后每一次都要参与。”
起初只是和理非地充人数、传物资，见到催泪弹就跑走，到后来鼓起勇气追着催泪弹去灭烟，只是一、两个月间的事。但阿芝还是觉得不够：“每次返到屋企睇新闻，都见到好多前线手足一系受伤、一系被拉，觉得自己好无用，咩都帮唔到手。”当 telegram群组有人提议升级做火魔法，她感到挺适合自己，“始终我系女仔，又唔高大，又唔够人打，上前线都只系负累，不如拣个灵活啲走位嘅职业。”并非没有思想挣扎，但挣扎的时间很短，“可能我一早就觉得和理非无用，只不过未踏出嗰一步去实行，思想上应该系已经准备好嘅。当时考虑嘅只系，哩样嘢我有无能力做到？”
八月底她首次与队友拿着“火魔法”上前线，算是较早的一批“魔法师”。因为第一次用怕失手，她没在最危急的关头丢，而是双方对峙期间、催泪弹不断射到前线的时候，就将瓶子掷到警方防线前面。一刹那，玻璃碎裂，火成功的燃起来。“开头我以为我会好惊、唔敢掟出去。但去到嗰一刻，嗯，我净系觉得，我终于喺哩场....我谂而家可以叫做革命？喺哩场革命之中，有我存在嘅价值。”
到九月中，实地用了四、五次后，阿芝感觉越来越纯熟，可以掌握到掷出去的最佳时机和角度。通常她会站在第二至四排的两侧，每当警方推前，就用火作屏障为前线争取撤退的时间。“10月1日屯门有个魔法师系用火用得好靓。当时速龙冲出嚟捉人，但佢离远掉咗个魔法过去，个火蔓延得好快，成队防暴同速龙就煞停咗，嗰度嘅手足系全部撤退晒走得甩。我哋最理想就系希望可以每次都做到咁样。”
10.1街头（立场新闻图片）
“其实好多前线都唔系真系特别大只、特别捱得，但次次都保护后排嘅和理非同街坊走先，自己就拎住啲烂木板、浮板同遮嚟硬食啲子弹同催泪弹。佢哋唔系对哩啲嘢免疫，真系硬食架咋。咁，我哩啲上唔到最前嘅人，都起码用火帮手筑吓防线。”
尽管不是最前排，火魔法师也面对很高的现场风险，“佢哋见到你拎住支嘢，都几突出嘅，会用枪瞄住我哋嚟射。我哋一开头未够经验时就系太犹疑，跟住有队友中咗弹啰。而家一拣到个适合位置就会即刻掉，无乜考量同犹疑嘅余地。你想赢，想保护你要保护嘅人，就要掟出去。唔可以惊，唔可以退缩。”
火的能与不能
阿亨的觉悟来得更早。2014年他在旺角见过黑帮流氓的凶狠、在龙和道见过警棍打落手无寸铁的市民头上。2016的农历新年，他去旺角笃鱼蛋，但在本民前和其他抗争者行动之前，就有人发现他“未够秤”，叫他早点回家。2019，他终于成年。6.12那天，有感自己食过催泪弹，觉得可以应付；未料迎面而来的是各式枪械，橡胶子弹、布袋弹、海棉弹，全部平射。“嗰日之后我就好清楚，佢哋系有预谋要开真枪去镇压我哋。然后我就接受咗哩个现实，好自然咁上咗前线。”
七、八月每个周末不同的地区游行，阿亨发现，“我哋只系重覆 set路障、顶住，然后防暴冲埋嚟、挡，跟住前面就无咗四、五十个手足。无可能咁样运作件事。”他认为必须要武力升级才有机会赢，尤其八月初开始警察就改变策略，由结阵对峙改为突然急奔上前抓捕，再没空间容许示威者慢慢用索带扎路障。
这时候前线开始讨论用火，阿亨没太多犹疑就加入“魔法师”行列，“火系好实用嘅，而家见到好多路障都会用火烧，因为快过扎索带好多。真系摆一堆杂物、淋啲油，一下子个火就着，大家退得快好多、走嘅空间多好多。”
“第二就系，佢哋真系会惊啰。”阿亨通常会留到最后才走，与防暴速龙最近的距离是10米，“佢哋冲得好狠，但多数捉落单同睇落瘦弱嘅人，见到你手上有火，起码两、三个人先够胆埋嚟。其实佢哋系好钖身，有火喺佢哋附近爆开，佢哋会避一避，冲慢咗。咁唔会真系伤到佢哋啲乜，但至少可能令到....起码心理平衡啲啰，等我哋有得做。”
阿亨所见，群众对“火魔法”的接受程度颇高，“现场系拍晒手咁，掟中警察大家仲欢呼添。”10.1那天，抗争者直接在现场炮制“火魔法”，一群中年街坊甚至即时在便利店买酒饮，饮完就把玻璃樽传出去。“我谂所谓民意逆转，系喺屋企睇电视嘅人就可能接受唔到。如果真系去过现场，对运动有实感，就会知道根本唔系所谓嘅示威者同警察对战。只不过系示威者顶到几耐得几耐，跟住示威者被屠杀。”
但禁蒙面法通过后，火的应用开始去到烧“黑心”商铺，阿亨就有点保留，“觉得件事有少少失控，我明大家都冲动、都好有情绪。几个月前件事系几好嘅，当有啲机构企业话撑警，就好多和理非日日去贴 memo、喷吓字。但有次喺湾仔，有人掟个火入去 Starbucks。嗰度系大厦第一层嚟，真系可能伤到普通人，咁我就唔同意啰。我不割席嘅，但我自己唔会做。如果有个汽油弹，掉入去政总好过啦。放火烧铺，我哋损失嘅民意支持会比得到嘅嘢多。”
***
“如果每个人都勇敢啲，可能已经赢咗”
当燃烧弹逐渐成为例牌菜，抗争阵营中有种感觉：我们终于跟外国的示威者看齐。看过《Winter on Fire》者，甚至可能幻想香港人会跟同样用火的乌克兰人一样，胜利在望。但阿亨觉得这是好大的误解，“其实示威者同警察仍然系完全无得打。”防暴警身上的绿衫隔火，即使掟中，拍一拍就熄，“而家问题系，就算夏悫道有几十万人，而对面有500个警察嘅时候，我哋都系俾人杀到片甲不留，跟住之后再少80至100个手足咁，因为认真进攻嘅都只系得7、80人。”
J加入成为“魔法师”，最直接的原因也是见到“唔够多人”。他今年暑假才考完文凭试升大学，由六月至七月都是主要去民阵游行的和理非，连6.9游行后占路、7.1冲立法会都有点保留和不理解。“但慢慢见到，依个政权真系无打算向人民屈服，前线又好多人被拉咗，越嚟越少真勇武，咁我觉得自己有能力做到嘅，就帮手出一分力啰。”于是，8.31他开始站前一点，九月中，他第一次掟砖。
9.15“岳义士”在北角打警察、抢回几个原本会被捕的示威者，对他来说是很重要的示范，“佢唤醒咗我哋，‘打狗救人’唔好净系得句口号，真系要落手做。如果每个人都勇敢一啲，可能我哋已经赢咗。”九月底掟砖开始掟得准之后，10.1便掟出个人第一支汽油弹，虽然只是试，掷在警察前好几米的空地，“都系人生一大步。”他有点抱歉的说，“我哩啲新血上嚟勇武，其实都唔系太知点做。”
踏入九月，本应回归校园。前线抗争者却越来越年轻，经常出现中学生的身影。
阿芝的感觉是，前线人数不算减少，但有经验的人少了，“有一群先锋系少咗，好多原因啦，可能俾人拉、或者逃亡咗。而补上前线嘅人经验唔够。”阿芝队中8个人，现已拉剩5个，“我自己又整亲，有个朋友都受咗伤。所以，有时都会谂，香港人嘅勇武系咪已经到咗顶呢？连火魔法都出咗，下一步仲可以做咩？整炸弹？炸弹嘅话，又会系点样用？7.21上环第一次用火嘅时候，都好多人话唔美观呀、真系变咗暴徒呀，要一段时间先可以说服到嗰班人返返嚟、唔割席。”
“但暂时嚟讲，我有啲觉得自己已经到咗顶喇。我嘅能力，已经尽咗，唔知再可以点样付出。我未想像到我好主动咁去攻击人，因为我做火魔法嘅原因都系想保护前线手足，唔系想令对面全军覆没或者死。哩个心态可能令到我限制咗自己。而家形势一日一日咁变，所有消息都太多太快。我会觉得系...而家个社会、而家个政府迫大家成长啰。所以哩个问题，我未有答案，或者你下星期、下个月再问我，我又成长咗，谂法唔同咗，又或者可能我已经俾人拉咗。”
又变“学生运动”？
阿亨对于这次运动的结局，倾向悲观，“我觉得今次大家未必赶得切，可能再五年后？当大家再接受多啲、或者当个情况再差啲，真系会有机会。但个问题系，当我哋好成熟咁用火魔法，佢哋就会好成熟咁用真枪。”他顿了一顿，“但…我系…你用真枪我就着防弹背心嘅感觉，系啰。”
“有样嘢我好唔开心嘅系…我真系见到啲细路喺前面，系真系唔够18岁嘅，拎住支铁通，但条铁通仲粗过佢只手。好明显系想出一分力，但佢哋都唔知自己做紧啲乜野，跟住好易就俾人拉咁。”
“六月嘅时候，系成个社会对抗紧极权，但之后大家又好似变返雨革咁，系支持年轻人对抗极权，上一代又缩头，我自己好讨厌哩样嘢，根本就系偷换咗个概念，好似变咗你落泪、你喺屋企话支持年轻人，已经好好咁，每一次嘅运动都系咁…我唔怨恨佢哋嘅，但你以前有机会嘅时候都无做到，唔可以因为你而家唔再系最年轻嗰一代，就觉得只系年轻人嘅事，你只系去支持佢哋，一定要成个社会参与先有机会成功。”
和理非不再上街，很多原因：有包袱、无不反对通知书，无地铁无车搭，也有一些，不认同勇武升级的抗争路线。但阿亨和阿芝都觉得，面对警暴和真枪实弹，前线没有不武力升级的选择；而且勇武升级是在200万人都游行过而没有回应之后的事。“五年前我都曾经以为，坐喺条街度就会有改变，”阿亨说，“嗰时大家咁众志成城，你觉得，就算一个伪民主政府，都唔能够咁样漠视民意呀？但原来唔系，佢系一个极权政府。咁五年来，人民赢过几多次？最多都系逃犯条例嘅正式撤回，唔系因为六月嗰两场一、二百万人游行㖞，系因为之后我哋个个星期出嚟同佢打，搞到佢鸡犬不宁，先至有之嘛。”
“我已经唔知做啲咩先可以达到我哋想要嘅目标，我哋做嘅，都只系搏一个可能性。我哋系无得返转头架，只可以将个情况一路推，推到去边缘，睇吓会发生咩事。我始终相信，对习近平嚟讲，无论系墙里面同香港，都系靠经济繁荣去支撑佢嘅独裁。所以我唔觉得佢会 risk到真系武力镇压香港人，跟住 risk自己成个主权。而如果我哋而家唔做嘅话，佢就会慢慢咁赢，慢慢清洗哩一代人，清洗成个香港。”
革命未至
然而，无论“革命”或“揽炒”，明显很多香港人并未有这样的准备，或不觉得有必要。阿亨都明白。“香港人好叻去适应件事，以前雨革成条路占咗，几廿万人声嘶力竭咁嗌自己嘅诉求，但好快大家就知道，我系搭车行唔到哩条路啫，佢哋继续做佢哋嘅嘢、我继续做我嘅嘢。今次又系，星期六日，我可能出去支持吓，跟住星期一至五照常返工。但革命嘅本质就系要完全推翻个社会制度，当你咁做时，其实大家现有嘅平静少少嘅日常生活系唔会再存在的。大家一定要舍弃到、放开到哩样嘢，先至有机会。”
他不认同成年人所讲的“包袱”，更不同意年轻人是因为“无嘢输”才去拼命。“我都读三大，career prospect ok架，要生活我一定生活得到。我只系谂，我五年前第一次出嚟嘅时候仲可以和平占领，但而家第一次参与社运嘅小朋友，已经挡警棍同橡胶子弹。咁我哋再下一代呢？佢一出嚟就系面对实弹。如果我哋觉得恐怖，佢哋面对嘅一定会比而家更恐怖。所以，我哋哩代人，真系有责任去做得几多得几多。”
阿芝读的是专业科系，若顺利毕业考到牌，她无论在香港或移民外国都会生活无忧。“如果无哩场运动，我应该可以日日开心玩、享受 U life？但而家就日日研究有咩策略，仲有啲咩可以做。”她的队友都年纪相若，但决定用“火魔法”之时，无人讨论过刑责或个人前途问题，“我哋只系考虑可行性、做唔做到。大家都讲咗，惊嘅话可以而家退出，决定咗就唔好惊。”
“其实之前我哋每次出去，都预咗会俾人拉，安全返到屋企系 bonus，所以究竟系纵火定暴动，我哋都无特登再去研究个刑责。对我嚟讲，无论坐两、三年、定系坐十年，心情都系差唔多，都系无咗自由，无晒前途，都系唔能够再继续为香港抗争。”面对队友陆续被捕，她只说，“我希望俾人拉嗰个系我，而唔系佢哋啰。因为佢哋每一个做嘅嘢都可以比我更多，佢哋前途可以比我更好。”
如果要谈代价
对于“留有用之躯”，或待群众基础更成熟才去做，阿芝不以为然，“总要有第一班人出嚟，先会有对群众的影响力。牺牲得早唔早唔系我关心嘅嘢，我只系希望我哋今日嘅牺牲，可以唤醒到未醒觉嘅香港人，或者将来历史可以证明到我哋今日咁做系正确。正如2016年嘅梁天琦，大部份人都觉得佢走得太前，但今日大家都叫住佢当日嘅口号。咁我希望今日嘅牺牲系有用啦，亦都相信会有用。因为，身边有好多人都感染咗嘅，同学嗰啲，会由港猪变成留意吓新闻，主动问吓系咪要登记做选民。”
谈到刑责，阿亨说知道、但唔想谂。“其实喺前线嘅我哋，好多人系宁愿俾人用真枪射死，好过去坐监。咁讲好似好 heavy...但大家嘅感觉系，如果有人喺前线被射死，可能人民嘅心态又会再有转变。大家已经惯咗有人中枪、爆眼、残废、私刑、强奸轮奸鸡奸，好似都惯晒咁，嗰啲浮尸，大家睇睇吓都麻木咗。咁净低一样嘢可以唤醒你去行动嘅，可能就系有人现场死啰。”
他有时也会想，可能牺牲了都换不来改变，香港人仍继续如常生活。“我谂唯有好历史观咁去睇，哩个就系一个 struggle嘅过程，至少你无放弃过 struggle，咁啰。相信个种子有埋喺度。即系...好似天琦、卢健民佢哋，坐六、七年嗰下，我谂佢哋都觉得，what the f**k？尤其是唔系带头嗰啲。但我好深信，2019年发生嘅事，一定系佢哋播下嘅种子嚟。咁…系啰，我哋之后会变成点，都唔到我哋控制。”
“我净系会谂一样嘢，我而家咁做，系因为我好相信哩件事。但系好多人，被捕之后呢，系会后悔自己参加过，好似多自己一个唔多、少一个唔少。当你俾人拉咗，你一定会咁样谂，我都明。咁我净系希望自己，如果真系要坐，唔好因为咁而觉得，自己做嘅嘢系错架啰。”
“但系次次出门口，谂到，哇屌，可能之后六、七年无得返屋企，都系觉得好痴线。”
＊＊＊
（为尊重受访者意愿，文中受访者皆使用化名）
