香港苹果旗舰店就快喺 IFC开张，唔少苹果忠心粉丝同网民，都热烈谈论呢间香港旗舰店有几劲，不过苹果粉丝呢两日讨论焦点，忽然由香港苹果旗舰店，转左去北京嘅苹果三里屯店，原因唔系因为呢间舖嘅装修几有苹果味、又或者有乜特别新产品开卖，而系因为一个电话号码，同埋一个全中国人嘅心愿：「平反六四」。
话说最近有网民发现，北京 Apple Store三里屯店嘅电话号码系（ 8610） 6419 8900。就咁睇似乎冇乜特别，但系假如将 8个位数字嘅电话码，删除最后两个零，成组数字就变成 641989，再拆开睇就系「 64」、「 1989」，亦即系八九年六四屠城日子。
其实由六四事件二十周年开始，已经不时有大陆新闻工作者、创作人将「八九」、「六四」隐藏在作品入面，曲线表态悼念及支持平反六四，最经典莫过于当年《南方都市报》刊登一辑儿童漫画，将「八九」、「六四」隐藏喺漫画入面，所以唔少网民认为， Apple Store呢个隐含「 64」同「 1989」嘅电话号码，绝对唔系偶然或巧合，而系有北京苹果员工运用无限创意，利用电话号码表达支持平反六四讯息。
网民甚至将电话号码当正系达文西密码咁研究，话 6419 8900，应分拆成 64、 1989、 00三组数字，即八九年六四事件入面，官方话天安门广场入面冇死过人（ 00代表死亡人数），讽刺北京唔认六四有屠城咁话！
有苹果粉丝同八方讲，呢个电话「密」码，可以话系大陆苹果粉丝「不能说的秘密」，虽然网上有人贴过出嚟，不过未见官方有任何动静，苹果方面亦冇改电话号码，八方支持苹果坚持下去，只系唔知几时阿爷会河蟹呢个「民主电话号码」啫！
